მარიამ ტყაბლაძე
ლუბლინის კათოლიკური უნივერსიტეტი (პოლონეთი)
მარიამ ტყაბლაძე, სამართლის სამაგისტრო პროგრამის სტუდენტია, რომელმაც მოიპოვა Erasmus+ ICM სასწავლო გრანტი და 2019-2020 წლის გაზაფხულის სემესტრზე სასწავლებლად გაემგზავრა პოლონეთში, ლუბლინის კათოლიკურ უნივერსიტეტში, თუმცა მსოფლიო პანდემიის ფონზე, დროზე ადრე მოუწია საქართველოში დაბრუნება. მარიამმა სწავლა ონლაინ რეჟიმში განაგრძო სემესტრის დასრულებამდე. მიუხედავად იმისა, რომ მარიამს მხოლოდ ერთი თვე მოუწია უცხოეთში ცხოვრება, მცირე გამოცდილების შეძენა მოასწრო.
- მარიამ, რამდენად გამართლდა თქვენი მოლოდინები ამ პროგრამასთან დაკავშირებით?
- პროგრამა იყო ძალიან საინტერესო და ნაყოფიერი, როგორც აკადემიური კუთხით ასევე სოციალური კუთხით. მოლოდინება რომელიც მქონდა როგორ პიროვნული განვითარების კუთხით რომელიც დაკავშირებულია სრულიად ახალ გარემოში ადაპტაციასთან, ახალი ცოდნის და გამოცდილების მიღებასთან, ახალი ხალხის და კულტურის გაცნობასთან შესრულდა, მიუხედავად იმისა რომ პანდემიის გამო სულ ერთი თვე მოვასწარი ყოფნა.
- რა იყო ყველაზე მთავარი ბენეფიტი თქვენთვის ამ პროგრამიდან?
- მთავარი ბენეფიტი იყო ახალ გარემოში საკუთარი თავის და შესაძლებლობების გამოვლენა და ე.წ. კომფორტის ზონიდან სწავლის და ახლის შემეცნების პროცესში გადასვლა.
- რომელი პერსონალური უნარების გაუმჯობესებაში დაგეხმარათ ეს პროგრამა?
- კომუნიკაცია ახალ ადამიანებთან, რომელიც გულისხმობს მარტივად გაიცნო და დაუმეგობრდე იმ ადამიანებს რომლებთანაც არც ეროვნება, არც კულტურა, არც საერთო სამეგობრო არ გაერთიანებს.
- რომელი პროფესიული უნარების გაუმჯობესებაში დაგეხმარათ ეს მობილობა?
- ადამიანის უფლებებში და ევროკავშირის სამართალში საინტერესო და მრავალმხრივი ცოდნა მივიღე, რომელმაც ჩემს სამაგისტრო ნაშრომზე უფრო მეტად და სხვა კუთხით დამაფიქრა.
- იქ ნასწავლი საგნებიდან რომელ სასწავლო კურსებს გამოყოფდით ყველაზე მეტად? და რატომ?
- ყველაზე საინტერესო იყო მოლაპარაკებები, ადამიანის უფლებები პრაქტიკაში და სამართლებრივი უნარები, რადგან ყველა ლექცია იყო ცოცხალი პროცესი რომელშიც მთლიანად ჩართული ვიყავი და ყოველი ლექციის დასრულების შემდგომ ვგრძნობდი რომ რაღაც ახალი უნარები დამემატა. მთლიანად ლექცია იყო ვორქშოფის ფორმატის რომელიც მოიცავდა დებატებს, როლურ თამაშებს, სიტყვის გამოსვლის ხელოვნებას რაც იურისტისთვის მნიშვნელოვანია.
- რა მოგენატრებათ ყველაზე მეტად?
- ქალაქი რომელიც პატარა მაგრამ ახალგაზრდული და ძალიან თბილი იყო ზამთრის ცივი ამინდების მიუხედავად.
- შეადარეთ სტუდენტის ცხოვრება საქართველოსა და უცხოეთში ...
- სტუდენტებს საქართველოში პარალელურად უწევთ მუშაობა და უმეტესად იმ სიამოვნებას რაც უნივერსიტეტში სწავლის დროს უნდა მიიღონ ვერ იღებენ, რადგან ორიენტირებული არიან სამსახურის შოვნაზე და მის შენარჩუნებაზე და უნივერსიტეტი არის დიპლომის აღების ადგილი და არა განვითარების და ცოდნის შეძენის. სტუდენტები უცხოეთში ბევრად უფრო ლაღები და თავისუფლები არიან, ნაკლებად დასტრესილები და გახსნილები.
- რა უპირატესობა აქვს გაცვლით პროგრამაში მონაწილეობას? რატომ უნდა მიიღოს სტუდენტმა მონაწილეობა მსგავს პროგრამაში
- გაცვლითი პროგრამა არის საშუალება გაზარდო შენი ხედვის არეალი და გაიცნო შენი თავი, შექმნა ისეთი ადამიანების ურთიერთობების წრე რომელიც მთელ მსოფლიოს მოიცვას და ჩამოხვიდე უფრო შემდგარი და დამოუკიდებელი პიროვნება.
- დაასრულეთ წინადადება: რომ არა ეს გაცვლითი პროგრამა, მე ....
- ვერ მივხვდებოდი როგორ მინდა ვიზრუნო იმაზე, რომ ჩემს ქვეყანაშიც ისეთივე მარტივი იყოს ყოველდღიურობა, როგორც ევროპაში.