ბავშვთა და მოზარდთა ფსიქოლოგია (მაგისტრატურა)
პროგრამის სახელწოდება: ბავშვთა და მოზარდთა ფსიქოლოგია (აკრედიტაციის პროცესშია)
მისანიჭებელი კვალიფიკაცია: ბავშვთა და მოზარდთა ფსიქოლოგიის მაგისტრი
პროგრამის ხელმძღვანელი: თამარ ქობულაძე, სოფიო ნადირაძე
სწავლის ხანგრძლივობა: 2 წელი (120 კრედიტი)
სწავლების ენა: ქართული
წლიური გადასახადი: 3300 ლარი
მისაღები ადგილების რაოდენობა: 15
ბავშვთა და მოზარდთა ფსიქოლოგიის სამაგისტრო პროგრამის მიზანია კურსდამთავრებულს:
- შესძინოს ღრმა და სისტემური ცოდნა ბავშვთა და მოზარდთა განვითარების ბიო-ფსიქო- სოციალური ასპექტების, განვითარებაზე მოქმედი რისკ-ფაქტორების და მხარდამჭერი სისტემების შესახებ;
- შესძინოს მულტიდისციპლინური ცოდნა და უნარები ბავშვთა და მოზარდთა შეფასების, კონსულტირების, მტკიცებულებაზე დაფუძნებული ინტერვენციისა და პრევენციული მხარდაჭერის თანამედროვე მიდგომების, მათი მიკროსისტემის მნიშვნელოვან წევრებთან თანამშრომლობის პრინციპების შესახებ, რაც უზრუნველყოფს სკოლამდელი და სასკოლო ასაკის ბავშვთა კეთილდღეობას;
- შესძინოს, ბავშვთა და მოზარდთა ფსიქოლოგიის გამოწვევების სიღრმისეული ანალიზისა და გადაწყვეტის მიზნით, პროფესიული ზეპირსიტყვიერი და წერილობითი კომუნიკაციის წარმოების უნარებისა და კვლევის სათანადო მეთოდების გამოყენებით, აკადემიური კვლევის დაგეგმვისა და განხორციელების უნარი;
- ჩამოუყალიბოს მაღალი ეთიკური ღირებულებები და პროფესიული პრაქტიკის პრინციპები, რომელთა საფუძველზე შეძლებს შემთხვევების მართვას და ინტერდისციპლინურ გუნდში მუშაობას საჯარო, არასამთავრობო და კერძო სექტორში, კულტურული მგრძნობელობის სოციალური სამართლიანობისა და განსხვავებულობის პატივისცემაზე დაფუძნებულიმიდგომების გათვალისწინებით.
კარიერული შესაძლებლობები:
ბავშვთა და მოზარდთა ფსიქოლოგის პროფესიული ფუნქციონირების არეალი მოიცავს:
ფორმალურ საგანმანათლებლო სისტემას (ადრეული განათლების ცენტრები, საბავშვო ბაღები, სკოლები, პროფესიული სასწავლებლები, უნივერსიტეტები), არაფორმალურ და ალტერნატიულ საგანმანათლებლო პროგრამებს, სამედიცინო-კლინიკურ გარემოს (ჰოსპიტალები, ჰოსპისები,სპეციალიზირებული კლინიკები, პედიატრიული განყოფილებები, სარეაბილიტაციო ცენტრები,ფსიქიკური ჯანმრთელობის დაწესებულებები, ადრეული ინტერვენციის ცენტრები, აბილიტაციის სერვისები), სახელმწიფო სტრუქტურებს (სოციალური მომსახურების სააგენტო, მანდატურის სამსახური, პენიტენციური დაწესებულებები, მუნიციპალური სერვის ცენტრები), ლოკალურ და საერთაშორისო არასამთავრობო ორგანიზაციებს და კერძო სექტორს (საკონსულტაციო ცენტრები, ინდივიდუალური პრაქტიკა სუპერვიზიით, კვლევითი ორგანიზაციები). პროფესიული განვითარებისგზაზე სპეციალისტებს შეუძლიათ ჩაერთონ საექსპერტო-საკონსულტაციო საქმიანობაში, აწარმოონ კვლევები, გახდნენ აკადემიური პერსონალი და გააგრძელონ სწავლა დოქტორანტურაში.